baaton pe jo tumhare aitbaar nahota....

Baaton Pe Jo Tumhare Aeitbaar Na Hota.
Phir Zindagi Bhar Ka Ye Intezaar Na Hota.
Khhud Ko Sambhaal Lete Agar Pahli Chot Pe.
Ghaayal Ye Dil Hamaara Baar Baar Na Hota.
Tajweez Kabhi Saamne Rakhte To Hamaare.
Allah Ki Qasam Kabhi Kabhi Inkaar Na Hota.
Ek Baar Aazma K Hame  Dekhte To Tum.
Ulfat Ka Safar Tum Pe Kabhi Baar Na Hota.
Seencha Hi Nahi Tumne Kabhi Pyaar Se Warna.
In Phoolon Ke Paudon Me Kabhi Khhar Na Hota.
Ek Baar Utar Kar Mere Andar Jo Jhaankte.
Achhchhaa Bhalaa Ek Aadmi Beemaar Na Hota.
Her Meer Ko Mil Jaati Ger Uski Ghazal Saad.
Phir Is Tarh Se Husn Ka Baazaar Na Hota.
saad.......

wo hamle ke liye farzi thikane dhond leta hai....

Wo Hamle K Liye Farzi Thhikana Dhoond Lete Hain.
Hame Badnaam Karne Ka Bahaana Dhoond Lete Hain.
Hifaazat Chahe Jitni Kijiye Apne Nasheman Ki.
Girane K Liye Wo Ghar Puraana Dhoond Lete Hain.
Unhe Allah Ne Bakhhshi Hain Doorandeshiyaan Itni.
K Rishton K Liye Achhchha Gharaana Dhoond Lete Hain.
Wo Garmi Ho, Ya Sardi Ho, Ya Ho Barsaat Ka Mausam.
Wo Milne K Liye Mausam Suhaana Dhoond Lete Hain.
Usi Duniya Me Tum Ko Rizq Ka Zariyaa Nahi Milta.
Jahaan Paagal Bhi Apna Aab O Daana Dhoond Lete Hain.
Bajaane K Liye Pandra Augast Chhabis January Ko.
Wo Allaamaa Ka Ab Qaumi Taraana Dhoond Lete Hain.
Saad Allah Ne Bakhhsha Hai Unko Haunslaa Kitna.
Samundar Me Utar Ker Jo Khhazaanaa Dhoond Lete Hain.
saad....

Ab ke sardi bohot sataiegi....

Ab Ke Sardi Bahot Sataiegi.
Dhoop Mushkil Se Chhat Pe Aaiegi.
Kakriton Ne Das Len Haryaali.
Ab Hawa Chhan Ke Kaisi Aaiegi.
Zindagi Ne To Neend Bakhhshi Nahi.
Maut Na Jane Kab Sulaiegi.
Din Ka Masalaa Hi Kuchh Nahi Lekin.
Raat Aaiegi Phir Daraiegi.
Usko Pakka Yaqeen Hai Ek Din.
Meri Ghhurbat Mujhe Jhukaiegi.
Meri Tasveer, Sher, Afsaane.
Ab Bhala Kya Kya Wo Bhulaiegi.
Dekh Ker Mujhko Badhawaas Saad.
Ma Phir Khhwabon Me Mere Aaiegi.
Saad....

Sahil agar hain ap to majhdhar kon hai…..

Sahil agar hain ap to majhdhar kon hai, kagaz ki meri nao par sawar kon hai. Ye sare faisle to tumhare nahi miyan, ho samne to tum bas ye deewar kon hai. Itni see bat pe kahan pohocha diya hamein,hammein rasookhdar assar dar kon hai. Or sirhane mere aake lage pochne sabse, bistar pe jo padha hai ye bimar kon hai. Baithe the sar jukai doli mein istarha, unko khabar hi kya thi ke kahar kon hai. Meri wafain apni jafah tollo pehle, phir faisla sunai ke gaddar kon hai. Or ekdin kami hamari khale gi bohot saad, jab log ye pocheinge ke sardar kon hai.
Saad….

Is Bade Ghar Se To Wo Phoos Ka Ghar Achhchha Tha......

Is Bade Ghar Se To Wo Phoos Ka Ghar Achhchha Tha. Rookhi Sukhi Hi Sahi Usme Guzar Achhchha Tha. Nai Zamane Ke Ye Nawjawan Kya Samjhenge. Ghar Ke Chhoto Pe Buzurgon Ka Wo Dar Achhchha Tha. Nasihaten To Meri Uspe Geran Guzri Magar. Kal Jo Wo Mujh Se Mila Us Pe Asar Achhchha Tha. Muh Sile Baithhe Rahe Dono Na Kuchh Bole Magar. Chaandni Raat Me Dariya Ka Safar Achhchha Tha. Bahot Se Yaaden Thin Wabistan Uski Shakhon Se. Be Samar Tha Magar Wo Boodha Shajar Achhchha Tha. Use Apnane Me Phir Kaun Si Majboori Thi. Mere Muqable Wo Shakhsh Agar Achhchha Tha. Meri Majbooriyan Le Aaien Yahan Mujhko saad. Warna Is Dyodhi Se Baba Ka Wo Dar Achhchha Tha.
Saad……